– राजकुमार यादव

रौतहट न्यूज़ / लामखुट्टेको टोकाइबाट हुने डेंगुबाट बच्न मौलापुर नगरपालिकाले ‘लार्भा खोज र नष्ट गर’ अभियान शुरू गरेको छ । 

विहिबाररदेखि पालिकाका विभिन्न क्षेत्रमा लामखुट्टेले अण्डा पार्नसक्ने सम्भावित स्थानको खोजी गरी लामखुट्टेको लार्भा नष्ट गर्न घरदैलो अभियान शुरू गरिएको हो ।

नगर प्रमुख रिना कुमारी साह, उपप्रमुख नागेन्द्र यादव , निमित्त प्रमुख प्रशासकीय अधिकृत रामबाबु साह लगायत जनप्रतिनिधि, कर्मचारी, स्वास्थ्यकर्मी र स्थानीयवासी अभियानमा सहभागी भएका थिए । सो अवसरमा नगर प्रमुख साहले अभियानलाई निरन्तरता दिने जनाउँदै सबै स्वास्थ्यका सवालमा नागरिक सचेत बन्नुपर्ने बताए । पानी जम्ने ठाउँमा लामखुट्टेले लार्भा बनाउने भएकाले पानी जम्न नदिन निरन्तर सरसफाइको लागि जनचेतनामूलक अभियान अगाडि बढाइएको उनले जानकारी दिए ।

कार्यक्रम नगरपालिकाको वडा नम्बर ५ स्थित आईटी देखी बसपार्क हुदै बजार क्षेत्रमा अभियान सञ्चालन गरिएको मौलापुर नगरपालिकाका स्वास्थ्य शाखा प्रमुख अच्छेलाल साहले बताए । उनले बजार क्षेत्रमा अभियान सञ्चालन गरिएको जनाउँदै आवश्यक्ता अनुसार सबै वडामा यो अभियान सञ्चालन हुने जानकारी दिए । डेंगुको जोखिम कम गर्न र सावधानी अपनाउनका लागि समुदायमा पुगेर सचेतना जगाउने काम गरिएको उनको भनाइ छ ।

विशेषगरी वर्षाको पानी जम्ने जथाभावी फालेका बोतल, टिनका भाँडा, थोत्रो टायर, अलकत्रा वा मट्टितेलका खाली ड्रम, गमला, पानीका ट्यांकी आदिमा यो लामखुट्टे फूल पार्छ । विशेष गरी साँझ–बिहानको समयमा सक्रिय हुने ‘एडिज एजिप्टी र एडिस एल्बोपिक्टस’ प्रजातिको लामखुट्टेको टोकाइबाट डेंगुको संक्रमण फैलिने गर्छ । उच्च ज्वरो आउने, टाउको, आँखाको गेडी, ढाड, शरीर, घुँडाका जोर्नी दुख्ने, पिँडौलाको मासु दुख्ने आदि डेंगुका लक्षण हुन् । जटिल प्रकृतिको डेंगुको संक्रमण भएका बिरामीमा थकान महसूस हुने, गिजाबाट रगत बग्ने, पेट असाध्यै दुख्ने, बारम्बार बान्ता हुने, सास फेर्न गाह्रो हुने, पेट र खुट्टा सुनिनेस्ता लक्षण देखा पर्छन् ।