-राजकुमार यादव

रौतहट न्यूज़ // जिल्लाको मौलापुर नगरपालिका वडा नम्बर ९ सोनरनियामा खेतामा दिसा गरेको निहुँमा भएको झडपमा कुटपिटबाट एक जना महिलाको बुधबार मृत्यु भएको छ ।

स्थानीय भोला यादवले बाँसको लाठोले प्रहार गरेर घाइते बनेकी ४० बर्षिय सुगान्धी देवीको उपचारको क्रममा वीरगन्जस्थित एल.एस न्यूरो अस्पतालमा गण्डमा साझ ५.५० बजे मृत्यु भएको हो । बाली हेर्न भनेर गएको बखत नचिनेका मान्छेले खेतको आलीमा गरेको दिसा कुल्चिएपछि भोलाले गाउँमा आएर छिमेकी सुगान्धीको घरमै पुगेर गालीगलौज गर्दै कुटपिट सुरु गरेका थिए । विवाद बढदै गएपछि भएको झडपको क्रममा यादवले धानको बेरीमा रहेको बाँसको लाठोले सुगान्धीको टाउँकोमा प्रहार गरेका थिए । खेतमा जाने बाटो (आली) मा दिसा गरेको भन्दै सुगान्धीको घरमा गएका भोलाले कुटपिट गर्न थालेपछि दुबै पक्षबीच झडप परेको थियो ।आक्रमणबाट गम्भीर घाइते भएकी सुगान्धीलाई उपचारको लागि अस्पताल लगिएकोमा उपचारको क्रममा मृत्यु भएको प्रहरीले जानकारी दिएको छ ।

घटनामा संलग्न भएको आरोपमा प्रहरीले भोलाको परिवारका ३ जनालाई नियन्त्रणमा लिएको र उनी भने फरार रहेको बताइएको छ । घटनाको बारेमा थप अनुसन्धान भइरहेको ईलाका प्रहरी कार्यालय मौलापुरका प्रहरी निरीक्षक नन्दकिशोर चौहानले घटनास्थलमा पत्रकार राजकुमार यादवलाई जानकारी दिनुभएको छ ।